കരബാവോ (ഇഎഫ്എല്‍) കപ്പില്‍ വമ്പന്‍ വിജയവുമായി ചെല്‍സി എഫ്‌സി. ഇംഗ്ലീഷ് ക്ലബ്ബായ ബാരോയ്‌ക്കെതിരെ നടന്ന മത്സരത്തില്‍ എതിരില്ലാത്ത അഞ്ച് ഗോളുകള്‍ക്കാണ് നീലപ്പട വിജയിച്ചത്. ചെല്‍സിക്ക് വേണ്ടി ഫ്രഞ്ച് ഫോര്‍വേഡായ ക്രിസ്റ്റഫര്‍ എന്‍കുന്‍കു തകര്‍പ്പന്‍ ഹാട്രിക് സ്വന്തമാക്കി.
⭐️⭐️⭐️⭐️⭐️#CFC | #CarabaoCup pic.twitter.com/HbVVAxhMSv
ഹോം ഗ്രൗണ്ടായ സ്റ്റാംഫോര്‍ഡ് ബ്രിഡ്ജില്‍ നടന്ന മത്സരത്തിന്റെ എട്ടാം മിനിറ്റില്‍ തന്നെ ചെല്‍സി ലീഡെടുത്തു. ജാവോ ഫെലിക്‌സിന്റെ അസിസ്റ്റില്‍ എന്‍കുന്‍കുവാണ് ചെല്‍സിയുടെ ഗോള്‍മഴയ്ക്ക് തുടക്കമിട്ടത്. 15-ാം മിനിറ്റില്‍ എന്‍കുന്‍കു തന്നെ ചെല്‍സിയുടെ ലീഡ് ഇരട്ടിയാക്കി.
28-ാം മിനിറ്റില്‍ ബാരോയുടെ ഗോള്‍കീപ്പര്‍ പോള്‍ ഫാര്‍മന്റെ ഒരു പിഴവ് സെല്‍ഫ് ഗോളില്‍ കലാശിച്ചു. ഇതോടെ ചെല്‍സിയുടെ ഗോളെണ്ണം മൂന്നായി ഉയര്‍ന്നു. രണ്ടാം പകുതിയിലും ചെല്‍സി ആക്രമണം തുടര്‍ന്നു. 48-ാം മിനിറ്റില്‍ പെഡ്രോ നെറ്റോ ചെല്‍സിയുടെ നാലാം ഗോള്‍ നേടി. 75-ാം മിനിറ്റില്‍ എന്‍കുന്‍കു ഹാട്രിക് തികച്ചു. ഇതോടെ ചെല്‍സി ആധികാരിക വിജയം ഉറപ്പിക്കുകയും ചെയ്തു.